Esta sesión especial propón unha viaxe polo universo de Adrián Canoura, cineasta e artista que leva máis dunha década explorando as posibilidades do cinema como ferramenta máxica, política e sensorial; unha inmersión visceral nas raíces galegas e a vangarda visual.

Nesta edición 2025 –e continuando a senda das experiencias audiovisuais de Vidal Bolaño– mergullámonos no período de tempo que abarca a segunda metade dos anos 80 e a primeira dos 90, que supuxo un terreo fértil e abonado para o audiovisual galego. A substitución do cinema doméstico polos primeiros formatos de vídeo como soporte amateur preferente e os inicios da televisión en Galicia abriron toda unha serie de vías nos eidos da ficción, o documental e o experimental que conforman un fito dentro da imaxe e o son do noso país.

Lucile Hadzihalilovic é unha cineasta do segredo, da sombra, do non dito. A súa obra, deliberadamente escasa e paciente, semella emerxer dende os bordes da conciencia, como un soño estraño do que espertamos sen comprender del todo o seu significado pero sentindo, no corpo, a súa pegada.